التغذية في سطور

اليوم درسنا عن الاكل , الانسان عشان يعيش لازم يتغذى و عشان يتغذى بشكل سليم يحتاج يآكل ثلاث وجبات في اليوم , ريوق و غدا و عشا , حلاته الريوق خفيف و الغدا ثقيل اما العشا فأيضا خفيف و اذا ما يتعشى بعد احسن , احنا بالريوق ممكن ناكل مربي و جبن و قشطة و في الغدا نحتاج اكلنا يكون اثقل شوي .. يعني مجبوس دياي على بشاميل و الذي منه , عقب في العشا ممكن ناكل مشويات على مقبلات على تبولة على حمص بس يفضل يفضضضضضضضضضل انه ما نتعشى , و لازم تحطون في بالكم مو تنسووون ريوق و غدا , عشا … عشاااااااا و ينظر لاحدهم  بحنق مفاده و الاخير وياك يعني متى بتسكت ثم يكمل او بالاحرى يعيد .. غدا , ريوق …

يتدخل احد الطلبة المجتهدين مستفسرا بقوله : دكتور سؤال ؟

الدكتور : نعم ؟!

الطالب : دكتور يعني يصير ناكل غوزي في الغدا امبدال المجبوس !!

الدكتور بعد تفكير : أي يصير ناكل غوزي في الغدا , ليش لا ؟!

الطالب : و سؤال ثاني دكتور ؟

الدكتور : تفضل , تفضل اصلا آنه تسعدني اسألتكم !!

الطالب : انزين يقولك يفضل الواحد ما يتعشه بس لمه يتعشه شنو الاجراءات المتبعة للتخفيف من حدة الوجبة ؟؟

الدكتور : سؤالك وجيه و ذكي ماشالله عليك , خصوصا كلمة حدة يبتها في الصميم الله يخليك حق هلك , توصلوا العلماء لتقنية ” من تعشه تمشه ” و تنص هذه التقنية على ان الانسان عقب العشا لازم يتمشه و اذا حبيت تعرف معلومات اكثر عن هذا الموضوع ممكن تدخل على هذا الموقع , دبليو دبليو دبليو دوت تفلسف زايد دوت كوم دوت جمباكوووو

ثم يكمل الدرس .. الريوق جبن و مربى و بيض و الغدا مجبوس , مجبوووووووووس حطوا تحت هالكلمة خطين حمر لانها مهمة و ممكن اتييكم في الامتحان و لو سمحتوا و لا حركة و لا صوت و يفضل ما تتنفسون خلوني اكمل درس الوجبات !! 

جفتوا الحجي اللي فوق , اشرايكم فيه ؟! اتعرفونه كله هذا اولا اما ثانيا فمشاعر متضاربة تلك التي تنتابكم , هي بين الملل و الاستغراب مع نية اغلاق الصفحة و التوجه لقراءة غيرها .. بالضبط هاذي الحالة اللي اكون فيها لمه دكتور يشرح لنا شي ماخذينه من قبل و يعيد و يزيد فيه بألحاح و يبينا ننتبه له مع الاختلاف في نية الخروج من الصف بدل اغلاق الصفحة . هالظاهرة تكثر مع بدايات الفصل الدراسي لأن بداية المناهج دايما تكون اشيا احنا ماخذينها من قبل , انزين ليش ما يمرون عليها مرور الكرام و يروحون للي بعدها .. الله اعلم هذا واحد و الله يساعد المجتهدين هذا اثنين !!

Advertisements

6 تعليقات to “التغذية في سطور”

  1. DUBAI Says:

    السلام عليك يا بحرينية

    بذمتج جي يدرسونكم؟

    شيء مساقات لازم يعيدون النظر فيها

    تقولين منهج الصف الثالث

    !!

  2. طعم السُكَر Says:

    لووول
    مبروك ضمنتي الــ A
    وهاذي سوالف جامعة البحرين والهدف تاخير الطالب عن التخرج بإثقال الخطه الدراسيه بمواد مالها معنى
    good luck ^_^

  3. فاطمة منصور Says:

    اي والله هذي حالنا ويا طريقة المجبوس .. بس تراني وصلت لمرحلة إن كل اللي يقوله الدكتورما أعرف وين الله قاطني فيه

    😦 الله لا يبلاكم و خلكم على الطريقة المجبوسية و الصبر زين و له أجر عند رب العباد

  4. anaarwa Says:

    قرأت للاخير
    وصلت لاني مافهمت
    قرأت الردود امكن أافهم
    حسيت انه تذمر ” مباح ” لطريقة تدريس
    موفقين يارب

  5. shaima alwatani Says:

    الغالية بحرينية
    بما أن في كل إعادة إفادة
    وحيث أن التكرار يعلم الشطار “وضعي أربعة خطوط حمراء تحت الشطار هذي”
    فيمكنك ممارسة الكتابة الحرة في وقت سماعك المحاضر اللبيب أو ممارسة أحلام اليقظة مع تمثيل دور المهتمة والمركزة
    تحياتي
    شيماء

  6. wara8mu5a6a6 Says:

    Dubai :
    اهلا دبي
    لا مو جذي يدرسونه
    بس آنه قاعدة اعطي مثال على درس ممل
    لأنه اهمه كله يعطونه دروس على غرارها
    اول السمستر و يبونه ننتبه المفروض يعطونه الخيار في ان نبقى في الصف
    او نطلع مع ضمان تسجيل الحضور
    اشكرج يا دبي على التعليق 🙂

    طعم السكر :
    اهلا طعم السكر
    جامعة البحرين معروفة بتأخير التخرج بس ما اعتقد
    في احد يغلب الجامعات الخاصة بأثقال الخطط
    الدراسية !!
    اشكرج على التمنيات اللطيفة هاذي و ان شالله نحصل الايه
    زيارة اولى اتمنى لا تكون الاخيرة 🙂

    فاطمة منصور :
    اهلا فاطمة
    اي بعد انتوا هالسنة تخرج لازم
    بالتوفيق ان شالله
    لووووووووووول عجبني المصطلح
    ” الطريقة المجبوسية ”
    اشكرج على التعليق 🙂

    anaarwa :
    اهلا اروى
    فعلا هو تذمر مباح لطريقة تدريس 😀
    ممكن اذا قريتي البوست مرة ثانية تفهمين عليه
    اشكرك على هذا المرور الاول
    الذي اتمنى ان لا يكون الاخير

    shaima alwatani :
    اهلا بالوطني
    احم احم شطار احم احم اشكرج
    >>> مشكل لمه الناس تاخذ كل شي بشكل شخصي :p
    و اهو هذا اللي يصير , اوقات اسوي روحي مهتمة و اوقات
    اقعد اكتب لمجرد اني امرن يدي على الانجليزي بس عشان يمر الوقت , وله آنه كلش موب متابعة , صعب لمه الواحد يتملل من التكرار
    شكرا على التعليق 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: